Жаннат ҳақида гап кетганда кўпинча шундай бир нарса эсланади: тахтда кимдир ўтирибди, атрофда булутлар, мусиқа чалиняпти, фаришталар эса ғам-ташвишсиз. Ростдан ҳам жаннат шундай зерикарли жойми? Бўлиши мумкин эмас.
Ахир ўзингиз бир ўйлаб кўринг: атрофингизга қарасангиз, Худонинг нақадар ажойиб ижодкор ва яратувчи эканига амин бўласиз. Агар бунга шубҳа қилаётган бўлсангиз, қуёшнинг чиқишига ёки ботишига назар солинг, ёки бутун борлиқнинг уйғунлигини тушунишга ҳаракат қилинг, ёки коинотнинг нақадар чексиз эканлиги ҳақида ўйлаб кўринг, ёки ДНК тузилиши ҳақида ўқиб кўринг. Шубҳасиз, Худо нима қилаётганини билади.
Хўш, жаннат ҳақида нимани билишимиз мумкин? Инжил бизга “У ерда ўлим ҳам, қайғу ҳам, йиғи ҳам, оғриқ ҳам бўлмайди”, дейди. Бу зўр-ку, тўғрими?
Бошқа ўлим бўлмайди? Рак, ОИТС, урушлар ёки қотилликлар бўлмайди, демоқчимисиз? Бу яхши-ку. Бошқа қайғу бўлмайди? Демак, бевалар, бола ўғирлашлар, маст ҳайдовчилардан жабрланишлар, зилзилалар бошқа ҳеч қачон бўлмайди, демоқчимисиз? Бу зўр-ку!
Бошқа йиғи ҳам, оғриқ ҳам бўлмайди? Демак, ажралишлар бўлмайди, қизлар зўрланмайди, ўсмир болалар ёки қизларнинг таналари пулга сотилмайди, одамлар семиз ёки озғин, новча ёки паканалигидан хижолат бўлишмайди, очлик ёки қашшоқлик бўлмайди, ёлғизликдан азият чекадилар қариялар бўлмайди, ҳеч кимнинг ҳаёти героин туфайли нобуд бўлмайди, хотини ва болаларини бокс халтасига айлантириб олган ароқхўр эрлар бўлмайди, ҳеч ким танасининг ранги бошқача бўлгани учун ҳақоратланмайди, нафратли сўзлар ҳеч қачон айтилмайди ёки эшитилмайди, демоқчимисиз? Ҳақиқатан ҳам жаннат жуда ажойиб жой экан!
Жаннат яна қанақа бўлади? Буни Худодан бошқа ҳеч ким аниқ билмайди. Аммо шу нарса аниқки, у ерда ҳаёт бутунлай ўзгача тарзда бўлади. Агар бу дунё жаннатни тасаввур қилишимиз учун кичик бир кўриниши бўлса, унда жаннатнинг ўзида Худонинг янада кўпроқ ва ҳайратланарлироқ яратувчанлигини кўра оламиз. Биз бутунлай ўзгача бўлган вақтни ва маконни кўрамиз, ҳатто ҳеч қачон орзу ҳам қилмаган янгича нарсалар билан машғул бўламиз. Шундай қилиб, булар ҳатто бизнинг тасаввуримизга ҳам сиғмайдиган нарсалар.
Айтинг-чи, сиз, айтайлик, жирафани ўйлаб топа олган бўлармидингиз? Ёки йўлбарсни? Ёки бўлмаса зебра ё филни? Майли. Эҳтимол, бу бўлиши мумкин. Лекин тўрт фаслни-чи? Ернинг ўз ўқи ва қуёш атрофида айланишини-чи? (Бу жуда зўр ўйлаб топилган, шундай эмасми?) Ойнинг Ердаги океан ва денгиз сувларининг кўтарилиши ва пасайишига таъсирини-чи? Инсон кўзларини-чи? Хўп, майли, жинсий алоқани-чи? (Бу эътиборингизни тортди-а?) Худо жаннатда сиз учун жинсий алоқадан ҳам яхшироқ нарсани яратиб қўйган бўлиши мумкинлиги ҳақида ҳеч ўйлаб кўрганмисиз? “Бўлиши мумкин эмас”, – дерсиз. Лекин ҳақиқатан ҳам шундай бўлса-чи?
Хуллас, Худо тенги йўқ ижодкор. Буни билиш учун эса атрофимизга назар ташлашнинг ўзи кифоя. Биз яшаб турган олам ғоятда ажойиб. Лекин, шундай бўлса-да, Худо бизнинг кўзларимизга ҳали ҳаммасини очиқ кўрсатгани йўқ. Бироқ, барибир, биз шу нарсага амин бўла оламизки, жаннат қанақа бўлишидан қатъий назар, у бизнинг тасаввурларимиздан анча юқорида. Биз шунчаки буни тасаввур қила олмаймиз.
Худони билиш ва жаннатга бориш ҳақида кўпроқ ўрганишни хоҳлайсизми? Худони Шахсан Таниб-Билиш мақоласига қаранг.
RSS Feed